1
Ey nihâl-i işve bir nev-res fidânımsın benim
Gördüğüm günden beri hâtır-nişânımsın benim
Ben ne hâcet kim diyem rûh-ı revânımsın benim
Gizlesem de âşikâr etsem de cânımsın benim
Derd-i aşkın ben senin bîhûde izhâr eylemem
Lâf edip âh u enîni kendime kâr eylemem
Hâsılı âlem bilir bu sırrı inkâr eylemem
Gizlesem de âşikâr etsem de cânımsın benim
Ey gül-i bâğ-ı vefâ ma'lûmun olsun bu senin
Hâr-ı cevrinle şehâ terk eylemem pîrâmenin
ölme var ayrılma yokdur öyle tutdum dâmenin
Gizlesem de âşikâr etsem de cânımsın benim
Gâhî inkâr eyleyip gâhî dönüp ikrârdan
Aksini seyr eylerim âyînede dîvârdan
Gerçi bu sûretle pinhân eylerim ağyârdan
Gizlesem de âşikâr etsem de cânımsın benim
Beste kıldım sâz-ı efkârı o zülf-i sünbüle
Oldu Gâlib perde-i âhım muhayyer sünbüle
Herçi bâd-â-bâd bağlandım hevâ-yı kâküle
Gizlesem de âşikâr etsem de cânımsın benim
2
Şu'le-i reng-i letâfet rûy-ı âlındır senin
Mürg-i dil pervâne-¡ şem'-i cemâlindir senin
Dâğ dâğ-ı sîne fânûs-ı hayâlindir senin
Devr eden hâtırda hep fikr-i visâlindir senin
Bezm-i aşka dâğ-ı dil hem şîşedir hem lâledir
Eşk-i germ âteşdir ammâ âteş-i seyyâledir
Câm-ı hüsnün gûyiyâ bir şu'le-i cevvâledir
Devr eden hâtırda hep fikr-i visâlindir senin
Cûybâr-ı bâğ-ı hüsnündür benim giryânlığım
Sanma ki âyîne-veş bî-hûdedir hayrânlığım
Gerdiş-i çeşmimden idrâk eyle ser-gerdânlığım
Devr eden hâtırda hep fikr-i visâlindir senin
Dûzah-ı sûz-ı dilârânın dil oldu mâ'ili
Eyledi girdâb-ı hayret Gâlib-i deryâ-dili
Çarhdan geçsem de geçmem senden ey meh hâsılı
Devr eden hâtırda hep fikr-i visâlindir senin
Gerdiş eylerse murâdımca bu dûlâb-ı felek
Cûybâr-ı vuslatındır hem-demim bî-reyb ü şekk
Şâhid olsun tâ'ifân-ı Arş olan fevc-i melek
Devr eden hâtırda hep fikr-i visâlindir senin
3
Sevelim yârı hat-âverliği hengâm olsun
Biz de bir gün görelim sâye-i dîdârında
Gündüz olmazsa da mihmânımız ahşam olsun
Biz de bir gün görelim sâye-i dîdârında
Reşk-i hûrşîd iken ol dilber-i âlî-evsâf
Etmesin her nazara cilve-i hüsnü isrâf
Bakmasın rûz u şeb âyîneye insâf insâf
Biz de birgün görelim sâye-i dîdârında
Acabâ hâtıra-i rûz-ı hisâb etmez mi
Etdiği va'de-i ferdâya hicâb etmez mi
Dağııdıp kâkülünü keşf-i nikâb etmez mi
Biz de bir gün görelim sâye-i dîdârında
Der-kenâr eyleyip ol mihr-i şafak-peymâyı
Çekelim subh-ı celî şa'şa'a-veş sahbâyı
Unudup mihnet-i dî-rûzu gam-ı ferdâyı
Biz de bir gün görelim sâye-i dîdârında
Söyle ey âh yetiş sen o meh-i tâbâna
Çekmesin kendini tâ ol derece pinhâna
Merhamet yok mu meğer Gâlib-i nâ-sâmâna
Biz de bir gün görelim sâye-i dîdârında
4
Muntazır teşrîfine saf saf durur serv-i çemen
Vaktıdır ey nev-bahâr-ı işve bu gülzâra gel
Yolların bekler gül ü nesrîn ü ar'ar yâsemen
Vaktıdır ey nev-bahâr-ı işve bu gülzâra gel
Sîne-i pür-dâğı gûyâ lâlezâr etdim sana
Çeşme çeşme eşk-i çeşmim cûybâr etdim sana
Bir müferrih bâğ-ı dil-cû âşikâr etdim sana
Vaktıdır ey nev-bahâr-ı işve bu gülzâra gel
Çekme istiğnâya nâz u cevri efzûn eyleme
Goncanın sad pâre olmuş bağrını hûn eyleme
Sebzezârın benzini soldurma mahzûn eyleme
Vaktıdır ey nev-bahâr-ı işve bu gülzâra gel
Cûşiş-i hûn-ı safâya ermeden vakt-ı sükûn
Etmeden bülbüllerin feryâdını fürkat zebûn
Gâlibi zencîr-i mevce çekmeden cûy-ı cünûn
Vaktıdır ey nav-bahâr-ı işve bu gülzâra gel
5
Gördüm hat-âver olmuş o mâh âh âh âh
Almış sipihri dûd-ı siyâh âh âh âh
Hâlim o yüzden oldu tebâh âh âh âh
Dersem aceb mi gâh-be-gâh âh âh âh
Düşdüm hevâ-yı zülfüne ol şûh-ı mehveşin
Çekdim kemân-ı aşkını ebrû-yı dil-keşin
Hikmet bu k¡m duhânına yandım o âteşin
Dersem aceb mi gâh-be-gâh âh âh âh
Ümmîdvâr iken ben o şâhın vefâsına
Me'lûf iken inâyet ü lutf u atâsına
Ağyâra uydu etdi sitem mübtelâsına
Dersem aceb mi gâh-be-gâh âh âh âh
Bir âşıkın ki olmaya hükm-i sitâresi
Aheng-i zulm ü zulmet ede mâh-pâresi
Ah eylemekden özge nedir söyle çâresi
Dersem aceb mi gâh-be-gâh âh âh âh
Bezmihde ben de Gâlib mestâneyim senin
Zencîr-i târ-ı zülfüne dîvâneyim senin
Etrâf-ı şem'-i cem'ine pervâneyim senin
Dersem aceb mi gâh-be-gâh âh âh âh
6
Bülbül erip bahâra yine âh âh âh
Başladı âh u zâra yine âh âh âh
Hat geldi rûy-ı yâra yine âh âh âh
Anber döküldü nâra yine âh âh âh
Ol mâh-pâre tutdu sitem ü resm râhını
Geh zâhir etdi gâh nihân etdi mâhını
Seyr eyle halka halka o zülf-i siyâhını
Kasd etdi târümâra yine âh âh âh
Terk etdi istirâhat-ı leyl ü nehârı dil
Ah u enîn ile geçirir rûzgârı dil
Derd ü gamınla kalmamış iken karârı dil
Etmekde ber-karâra yine âh âh âh
Yüksek uçup gurûr ile ol gayret-i melek
Bir dem murâdım üstüne devr etmedi felek
Feryâdı perde perde çıkardım sipihre dek
Bak âh-ı bî-şümâra yine âh âh âh
Gâlib o gül-izâra olup mübtelâ hemân
Sevdâ-yı aşkın etmededir iddi'â hemân
Ol âteş ile yanmadadır dâ'imâ hemân
Ah etmeyip ne çâre yine âh âh âh
7
Emrine dil-bestedir her dilber-i fettân senin
Şehr-i hüsnün şehriyârısın bugün fermân sen¡n
Devr eder vefk-ı murâdınca bütün devrân senin
Şehr-i hüsnün şehriyârısın bugün fermân senin
Gel keremkârım dil-i uşşâkı mahzûn eyleme
Gonca-veş perverdegân-ı vaslı dil-hûn eyleme
Fürkat âdet olmasın kan eyle kânûn eyleme
Şehr-i hüsnün şehriyânsın bugün fermân senin
Bûy-ı hicrân vermesin gül-berg-i handânın dirîğ
Zâr u giryân olmasın uşşâk-ı nâlânın dirîğ
Dest-bûs olmazsa bârî etme dâmânın dirîğ
Şehr-i hüsnün şehriyârısın bugün fermân senin
Hûblar saf saf d¡zilmişler senin dîvânına
Tâ'ifân-ı Arş-ı A'lâ reşk eder ünvânına
Bir nazar kıl arz-ı hâl-i Gâlib-i nâlânına
Şehr-i hüsnün şehriyârısın bugün fermân senin
8
Ey şeh-i hûbân-ı cihân toğrısı
Ben sana dîvâneyim âh âh âh
Böyledir el-hâsıl inan toğrısı
Aşk ile efsâneyim âh âh âh
Hem-dem iken her dem o meh-tal'ata
Mahrem iken meclis-i ünsiyyete
Ayîne-veş şimdi düşüp hayrete
Akl ile bî-gâneyim âh âh âh
Tâ-be-seher şevk ile ey nâzenîn
Haste-i hicrânını kıldm hazîn
Yerde kalır sanma bu âh u enîn
Şem'ine pervâneyim âh âh âh
Ateş-i dîdârın olup şu'lever
Yakdı vücûd âlemini ser-te-ser
Kalmadı Gâlib dil ü cândan eser
Dahı nice yanayım âh âh âh
9
Arzû-yı vuslatın her-dem dil-i pâkimdedir
Gevher-i aşkın sadef-veş sîne-i çâkimdedir
Dâ'imâ bu şübhe ammâ tab'-ı gamnâkimdedir
Kangı âşıkdır senin gönlünde gönlün kimdedir
Pîş-i râhında senin ey şâh-ı hûbân bende çok
Dâd-hâhın hadden efzûn sâ'il-i hâhende çok
Yalınız bir ben değil efgende çok hâhende çok
Kangı âşıkdır senin gönlünde gönlün kimdedir
Perçemin sevdâsı her şeb kîl-ü-kâlimdir benim
Bahs-i zülfün çok zamânlardır hayâlimdir benim
Sormak ayb olmazsa sultânım su'âlimdir benim
Kangı âşıkdır senin gönlünde gönlün kimdedir
İmtiyâza kâ'ilim ben terk-i ağyâr istemem
Bildiğimdir hüsn-i âlem-gîrin inkâr istemem
Toğrısın söyle bana aldatma bâzâr istemem
Kangı âşıkdır senin gönlünde gönlün kimdedir
Perçemindir Gâlibi bî-sabr u sâmân eyleyen
Tal'atın mir'âtıdır uşşâkı hayrân eyleyen
Gerçi sensin herkesin gönlünde cevlân eyleyen
Kangı âşıkdır senin gönlünde gönlün kimdedir
10
Fâriğ olmam eylesen yüz bin cefâ sevdim seni
Böyte yazmış alnıma kilk-i kazâ sevdim seni
Ben bu sözden dönmezim devr eyledikçe nüh felek
Şâhid olsun aşkıma arz u semâ sevdim seni
Bend-i peyvend-i dilim ebrû-yı gaddârındadır
Rişte-i cem'iyyetim zülf-i siyeh-kârındadır
Hastayım ümmîd-i sıhhat çeşm-i bîmârındadır
Bir devâsız derde oldum mübtelâ sevdim seni
Ey hilâl-ebrû dilin meyli sanadır toğrusu
Sûy-ı mihrâba nigâhım kec-edâdır toğrusu
Râ kaşından inhirâf etsem riyâdır toğrusu
Yâ savâb olmuş veyâ olmuş hatâ sevdim seni
Bî-gubârım hasret-i hattınla hâk olsam yine
Sıhhatım rûh-ı lebindendir helâk olsam yine
Tîğ-ı gamzenden kesilmem çâk çâk olsam yine
Hâsılı bî-hûde cevr etme bana sevdim seni
Gâlib-i dîvâneyim Ferhâd u Mecnûna salâ
Yüz çevirmem olsa dünyâ bir yana ben bir yana
Şem'ine pervâneyim pervâ ne lâzımdır bana
Anlasın bî-gâne bilsin âşinâ sevdim seni
