KASİDECİK (kasidebeçe)
Kasidebeçe /Kasidebeççe/Kaside-beçe/Kaside-beççe olarak isimlendirilen bu nazım şekli, küçük kaside, kaside kavrusu, yavru kaside olarak bilinir. Kasideden kısa gazelden uzun olan bu nazım şekline Nabi ve Naili'de örnekler bulunur.
Kasîde-beçe (Nail-i Kadim)
Salâh-ı âlem-i kevn olsa ger fesâdı kadar
Olurdu kâm-revâ ehl-i dil muradı kadar
Bu köhne mezra'adan neydi dâne-çîn olmak
Müfîz olaydı zamân-ı direv hasâdı kadar
Ne anlanır bu serây-ı sipenc-i fânîden
Ki ola vakt-ı taleb ömrün imtidâdı kadar
Bırakma dâmenin elden mahabbetin ki olur
Kulun takarrubu Mevlâsına vedâdı kadar
Kabûl-i aks eden âyîne-i tecellâdan
Cemâl-i Hakkı görür hüsn-i i'tikâdı kadar
Revâ mıdır ki bu berzahda deşt-i hırmânı
Belâ-keş olmaya dil Kays-ı nâ-murâdı kadar
Rızâ karin ola hâşâ o nâkesin ki olur
Hulûsu devlet-i dünyâya i'timâdı kadar
Hulûs muhlis-i acz-âverândır anlama kim
Ola inâyet-i Hak tâ'at-ı ibâdı kadar
Ba'îd olur kişi dergâh-ı zü'1-gıyâsından
Hevâ-yı nefsine teslîm ü inkıyâdı kadar
Silâh-ı fakr u rızâ sâhibin eder me'cûr
Cidâl-i nefs-i bed-âyîne-i cihâdı kadar
Hazer cebâbireden kim her-âyîne o gürûh
Bulur garâmet-i takdîri inşidâdı kadar
Şehân-ı taht-nişîni bu kasr-ı nüh-tâkın
Mu'ammer olmaya Cemşîd ü Keykubâdı kadar
Za'îf olanlara müstekbirân-ı ucb u gurûr
Müzâhim olmaya dehrin Semûd u Âdı kadar
Ne ihtimâl ki nezd-i Hudâda ehl-i kemâl
Halâyıkın ola eşhâs-ı bed-nihâdı kadar
Beraber olsa hakîkatde cümle-i evkât
Azîz olur mu merâtibde bâmdâdı kadar
Olur mu sâlik-i âgâha bir mesîre-i feyz
Vücûd âleminin mebde' ü me'âdı kadar
Kemâldir nazar-ı ehl-i dilde hûbânın
Olursa nâzişi hüsn-i Hudây-dâdı kadar
Sa'âdet-i ezelî Nâ'ilî anın ki ola
Penâh-gâh-ı kaza cây-ı istinâdı kadar
Hiç yorum yok:
Yorum Gönder
Yorumlarınızı bekliyoruz.