Muhammes Özellikleri ve Muhammes Örneği

 

4-7 bent arasında yazılır. Uyak şeması aaaaa, bbbba, cccca, dddda, eeeea şeklindedir. Mısra sayısı yönüyle tahmis-beşleme, taştir-yararak beşleme, tardiyeye benzer.

Muhammes

 

I

Ey şeh-i hûbânım eyle ol kad-i mevzuna sen

Reng-1i gülden câme bûy-ı yâsemenden pîrehen

Servsin sana yeşil şâlî gerekdir nîm-ten

Reng-i gülden câme bûy-ı yâsemenden pîrehen

Bağa gel ey gül-beden açıl gül ey gonce-dehen

 

II

Devr-i Sultan Ahmed-i Gazidir ey şûh-ı cihan

Müjde-i feth olmada her lahzada şâdî-resân

Sana lâyık böyle eyyâm-ı meserretde hemân

Reng-i gülden câme bûy-ı yâsemenden pîrehen

Bağa gel ey gül-beden açıl gül ey gonce-dehen

III

Mû-miyânım pek güzel yûkışdı buldan sana

Hem muvafık düşdü bu destâr-ı hünkârı sana

Goncesin söyle sabâya eylesin bârî sana

Reng-i gülden câme bûy-ı yâsemenden pîrehen

Bağa gel ey gül-beden açıl gül ey gonce-dehen

 

IV

Kâkülünden perde çekmişsin ruh-ı tabanına

Aferin ey gonce-i bâğ-ı edeb 'irfanına

Nâz-perversin ederlerse sezadır sânına

Reng-i gülden câme bûy-ı yâsemenden pîrehen

Bağa gel ey gül-beden açıl gül ey gonce-dehen

 

V

Giymiş ol rûh-ı musavver kırmızı canfes kaba

Lâleveş gördüm seher açıldı gülşenden yana

Cism-i pâkine münâsib gelse olurdu sezâ

Reng-i gülden câme bûy-ı yâsemenden pîrehen

Bağa gel ey gül-beden açıl gül ey gonce-dehen

Muhammes Örneği -Şeyh Galib 1

MUHAMMES

Dilberle her şeb eyler iken îş u işreti

Şîrîn-sâz-ı kâmı iken şehd-i sohbeti

Sahbâ-yı vasla sonra katıp zehr-i fürkatı

Aşk olsun ana kim çeke câm-ı melâmeti

Hem-reng-i la'l-i yâr bile hûn-ı hasreti

 

Kem-yâb idi metâ'-ı ser-â-pâ-yı hüsnü hayf

Yoğdu nazîr-i gevher-i yek-tâ-yı hüsnü hayf

Çesbân idi merâmıma bâlâ-yı hüsnü hayf

Nakd-ı hayâta müft idi kâlâ-yı hüsnü hayf

Şeh-bender-i firâkda anlandı kıymeti

 

Çeşmi bakılsa tîğ-ı sitemden yaman imiş

Perçem hatma nisbet ile Müslimân imiş

Hûnî nigâh-ı gamzesi cellâd-ı cân imiş

Bir rahmı yok mürüvveti yok bî-emân imiş

Bi'llâh böyle bilmez idim ben ol âfeti

 

Tâb-ı te(m)mûz-ı hecrin ile yandım ağladım

Sahbâ-yı hûna teşne idim kandım ağladım

Bu mâcerâyı ben tükenir sandım ağladım

 

Cânâ safâ-yı bezmini çok andım ağladım

Yâd eyleyip o neş'eleri ol meserreti

 

Gâlib şeb-i mihende çekip âh u vâların

Künc-i sitemde terk edesin bî-nevâların

Derd ü belâda anmayasın mübtelâların

Ağyâr-ı dûna hâss edesin hep atâların

Kurbânın olduğum bana düşmez mi gayreti

 

Muhammes Örneği-Şeyh Galib 2

MUHAMMES

O mehin meclisi reşk-âver-i hûrşîd olsun

Sâyesi hâbgeh-i çeşm-i sitem-dîd olsun

Gâhîce bârî gönül nâ'il-i ümmîd olsun

Varalım bezmine vuslat yine tecdîd olsun

Gecemiz Kadr-i mübârek günümüz îd olsun

 

Mey-perestân olıcak bâng-zen-i Yâ Ma'bûd

Eylesin kulkul-i mînâ dahı âheng-i sürûd

Derd-i aşkı beni kılsın mütesellî hoşnûd

Mest olup bâde-i nahvetle dil-i fakr-âlûd

Görelim âlem-i endîşede Cemşîd olsun

 

Gamzesi câna yakın kâfır-i câdû-fikret

Arızı âteş-i sad-hirmen-i akl u fıtrat

Nergisi vâkıf-ı her neş'e vü her keyfiyyet

Gerçi takrîr-i merâm etmeğe yokdur hâcet

Bâ'is-i âh u figânım buna te'kîd olsun

 

Düşmesin mürg-i hevâ sehv ile dâm-ı kesele

Beste-dil kalmayalım rişte-i tûl-i emele

Neş'emiz yoğsa dahı aşk-ı hakîkatda hele

Feyz-i hikmetle alıp sâgar-ı sahbâyı ele

İçelim mey sevelim dilberi taklîd olsun

 

Tutdu Gâlib katı çok rûze-i derd ü elemin

Kalmadı tâb u tüvân çekmeye cevr ü sitemin

Yeter ey şeh yeter ağyâr-ı denî sürdü demin

Görelim biz de meh-i lutf ile mihr-i keremin

Gecemiz Kadr-i mübârek günümüz îd olsun