Na't ve Na't Örneği

 Tokatlı Kani Divanı

Na‘t-ı Şerîf

Mefâ‘îlün Mefâ‘îlün Mefâ‘îlün Mefâ‘îlün

Ruhuñdur şâhid-i esrâra peyker yâ Resûla’llah

Lebüñdür sûretâ rûh-ı musavver yâ Resûla’llah

Hazîz-i şarkda cirm-i kamer zann itme kim düşdi

Görüp şânuñ senüñ mihr-i münevver yâ Resûla’llah

Sen ol remz-âşinâ-yı fâş-gû-yı  sırr-ı ‘irfânsın

Ki itmişdür Mesîhâ na‘tuñ ezber yâ Resûla’llah

Senüñ yoluñda ölmek gerçi hayli işdür ammâ

Göñül ölmekden ise hıdmet ister yâ Resûla’llah

Su’âl-i haşr olup âmîhte hevl-i kıyâmet ile

Cevâbın ehl-i cürmüñ başkalar der yâ Resûla’llah

6Gerek ûd u gerek ‘anber senüñ yanaklaruñdandur

Tenüm berk-i hazân-âsâ ditirer yâ Resûla’llah

Nesîm-i lutfuñ olmazsa ferah-bahş ehl-i ‘isyâna

Siyehkârân-ı bâd-ı kahr sarsar yâ Resûla’llah

Ucı ortası bulınmadıgıçündür senüñ sırruñ

Kürî oldıgı bu nüh-çarh-ı çenber yâ Resûla’llah

Saña bu süllem-i nüh-pâye-i gerdûn ise azdur

Gerekdür câmi‘üñde gayrı minber yâ Resûla’llah

İki reşha lebüñden sûret ü ma‘nâya feyz olmış

Birisi âb-ı hayvân biri kevser yâ Resûla’llah

Olaldan nâfe-rîz-i dest-i rahmet zülf-i pür-çînüñ

Günehkârânuñ oldı işi ‘anber yâ Resûla’llah

Bu Kânî bendeñe yok tesliyet bi’llah ‘âlemde

Anı ümmîd-i feyz-i lutfuñ egler yâ Resûla’llah